In der Junge Garde vo den Aagfraessene...

...isch immer ebbis los! Syyt em Johr 1971 steehn mer and der Fasnacht y und gniesse der Höhepunggt im Glyggejohr, die drey scheenschte Däg, in volle Zyg. Ass es an der Fasnacht musikaalisch guet deent, iebe mer s ganz Johr yber, am Donnstigzoobe pfyffe d Pfyffer und Pfyffferinne im Glyggekäller vo de Pfluderi und vo de Basilisge und d Dambuure schwinge ihri Schlegel am Donnschtigzoobe in unserem wunderscheene Glyggekäller am Nodlebärg. Instruiert wärde die Junge vo intärne und extärne Instruggter.

Well an der Fasnacht nit nur s Musikaalische, sondern au s Optische e wichtigi Rolle spyylt, hän mer e Sujetkommission. Die Sujetkommission bestoht uss Kinder vo der Junge Garde und Hälfer vom Stamm, sie dien zämme s Sujet ussarbäite, sie iberlege sich, welli Goschdym zum Sujet passe wurde, welli Stoff sich derfyr aigne und spräche sich mit der Schnydere ab. Denn geehn sie in der Arbetskäller und sueche deert uss ganz e Huuffe Larveforme aini oder mehreri uss. Wenn sie e passendi Form gfunde hän, gohts ans Kaschiere. Jedes Johr im Herbscht findet der „Kaschiermarathon“ statt, das isch e Wuuchenänd, wo im Arbetskäller gschaffe wird bis d Wänd gwaggle! Alli Junge hälfe mit, es wärde Larve kaschiert und Perügge knipft.

Näbscht de Fasnachtsvorberaitige gits e Huufe Ussflyg s ganz Johr duure:  Vor dr Summerferie mache mir immer am Glygge-Grimpeli mit. Im Herbscht gohts ins Weekend oder mir geehn mer uff Ruscht in Europa Park, die Wilde seggle deert vo Bahn zue Bahn, die wo s gmietlig näh wänn, laufe und luege umme und leehn sich vo däre Erläbniswält verzaubere. Langwyylig wird’s uff jede Fall niemerem. Afangs Dezämber findet der dradizionell Niggi Näggi statt. Als Ystimmig uff d Fasnacht mässe sich die Junge denne am intärne Brysdrummlen- und Pfyffe, wo scho e baar Johr in verschiidene Sääl in dr Stadt yber d Bihni goht. Es git tolli Pryyse fyr die Grosse und die Klaine z gwinne! Im Friehlig, wenn d Fasnacht und der Bummel scho lengscht der Vergangehait agheere, foht s neye Glyggejohr a und mer freyen ys uff die näggscht Fasnacht und uff dä Momänt, wos am Mäntig am Vieri haisst: Morgestraich vorwärts Marsch!

D Gschicht vo dr Stammclique

Usszuug: dieaagfraessene.ch

S isch kalt gsi, am Donnschtig am 4. Dezämber 1952. Am Daag voraane isch der erscht Schnee gfalle und vyli hänn gnueg kaa vo däm nasse Sauwädder, wo syt ainiger Zyt gherrscht het. Iberall sinn Iberschwemmige gmäldet worde, und d Schiff uff em Rhy hänn nimmi kenne fahre, will s Wasser z hoch gstanden isch.

Anderi dergege nämmlig gnau acht, hänn ganz an anderi Sache im Kopf kaa. Sy hänn sich zoobe im Restaurant Pigalle zer Grindigsversammlig von ere neye Glygge droffe. Als Namme hänn sy sich fir "Die Aagfrässene" entschide. Es sinn vorwiegend aagfrässeni Dammbuure gsi, wo ihri Wurzle in der Rätz-Glygge kaa hänn. Als erschte Obmaa isch der Charly Tavel gwählt worde. Der Charly isch unter de Fasnächtler, vor allem bi de Sujetobmänner und Ladärnekinschtler iber langi Zyt nit ewägg z dängge gsi. Und s gitt wohrschynlig nit mängi Glygge, wo der Charly nit als Lambbelymer und -laggierer gwirggt het.

Sälbetsmool hets Frauestimmrächt z Basel noonig gää, aber me het scho intensiv driber diskutiert. In der Wält usse hänn der Eisenhower, der Churchhill und der Stalin s Saage kaa. D Amis sinn au grad in e Krieg verwigglet gsi, in Koreakrieg.

Mir hänn ys grad muetig als Stammglygge bim Comité aagmäldet, obwohl mer an der erschte Fasnacht numme mit säggs Dammbuure gloffe sin, derfir hänn mir aber e Waage kaa. Sälbetsmool hets no kaini Ufflaage vo Syte vom Comité bezyglig Stammglygge gää. An der zwaite Fasnacht sinn denn au no e Hampfle Pfyffer derzue koo und au zwai Vorrytter. Kinschtlerisch simmer in den erschte Johr vom Rolf Gautschy bräggt worde. Är isches au gsi, wo im 1960 unser Signeet entworfe het, wo hitte no s Marggezaiche vo unserer Glyggen isch.